Быць заўсёды і ва ўсім – першымі

Пазнаёміліся са студэнтамі БРУ, якія працуюць у складзе студэнцкага атрада «ГОСТ» на «Магілёўтрансмашы»

Вы таксама думалі, што студэнцкія атрады – унікальная з’ява выключна летніх канікул? Мы завіталі на завод «Магілёўтрансмаш», дзе зараз у складзе атрада «ГОСТ» працуюць студэнты Беларуска-Расійскага ўніверсітэта, і гатовы абвергнуць гэты стэрэатып. Чаму моладзь замест адпачынка выбірае працу на прадпрыемстве? Што дае такі досвед студэнтам і ці не перашкаджае дадатковая практыка навучанню? Адказы на гэтыя пытанні – у нашым матэрыяле.

Тэорыя на практыцы

Дзень пахмурны, дробны дожджык. У такі час студэнты звычайна нудзяцца ва аўдыторыях, пазяхаюць і пазіраюць на гадзіннікі, якія так марудна адлічваюць час. Аднак студэнтам БРУ, што аб’ядналіся ў атрад «ГОСТ», сумаваць няма калі. Кожны з іх працуе на адказным участку, дапамагае прадпрыемству вырашаць важныя вытворчыя задачы.

На плячах – фірмовыя курткі «МАЗ», а на тварах вясёлыя ўсмешкі. Трыццаць маладых людзей з 1 да 29 красавіка разам працуюць на «Магілёўтрансмашы». У сяброўскім калектыве можна і папрацаваць, і пажартаваць, і штосьці новае засвоіць. Тое, пра што ва ўніверсітэце толькі расказвалі.

Студэнт 4 курса факультэта машынабудавання Юрый Міхалап – камандзір. У студатрадаўскім руху ён чалавек бывалы: летась таксама працаваў на «Магілёўтрансмашы», тады дзве змены, адну з якіх узначальваў, на галаўным прадпрыемстве «МАЗ». А сёлета вырашыў пачаць працоўны сезон у Магілёве.

– Тут цудоўны калектыў, завод месціцца недалёка ад майго дому, работу добра аплачваюць, да новых людзей ставяцца надзвычай цёпла, – пералічвае плюсы хлопец. – З першых дзён адчуваю сябе паўнапраўным членам калектыва, нібыта на прадпрыемстве год дваццаць працую. Студэнцкія атрады даюць магчымасць пабачыць унутраны бок прафесіі. Прыходзіш на завод, ведаеш, што гэта працуе так, а гэта вось так. Але ўсё – толькі на словах. А спрабуеш працаваць – і ўнікаеш у нюансы, пачынаеш гэтым жыць. І ўжо прафесійная дзейнасць не будзе адкрыццём і крокам у невядомае.

Навічкі, як правіла, выконваюць больш простыя задачы, а ў Юрыя фронт работ сур’ёзны. І, што самае галоўнае, непасрэдна па прафесіі.

– Я займаюся ўстаноўкай платформ. А пасля на гэтыя платформы ставяцца кабіны для машын. Ва ўніверсітэце атрымліваю спецыяльнасць «інжынер-тэхнолаг». «Магілёўтрансмаш» ува мне зацікаўлены як у будучым спецыялісце. Сёлета заканчваю ўніверсітэт, размеркавацца планую сюды. І, скажу пад сакрэтам, хлопцы, з якімі другі год разам працуем ў студатрадзе, таксама спадзяюцца прыйсьці працаваць у статусе маладых спецыялістаў менавіта на «Трансмаш».

Арцём Сямёнаў таксама студэнт выпускнога курса, але ў вытворчы атрад патрапіў упершыню: змена амаль супадае з пераддыпломнай практыкай.

– Работа ў мяне не складаная, але трэба набіць руку. Працую некалькі дзён, аднак абстаноўка добрая, усё тлумачаць, разумеюць, што я першы раз на прадпрыемстве. Пакуль прыглядваюся, вывучаю ўнутраную спецыфіку работы. Крыху шкада, што не далучыўся да студатрада раней. Усім раю не баяцца і не адкладваць: гэта і практыка, і фінансавая падтрымка добрая. Ад таварышаў, якія раней ужо працавалі на заводзе, атрымліваў станоўчыя водгукі. Таму заробкам, думаю, буду задаволены.

Важная прыступка для росту

Беларуска-Расійскі ўніверсітэт – адзін з флагманаў студатрадаўскага руху ў краіне. Кожны год усё больш студэнтаў накіроўваюцца на прадпрыемствы і будоўлі Беларусі і Расіі. І заўсёды прадстаўнікі БРУ наперадзе – як у рабоце, так і ў грамадскім жыцці калектыва. Сакратар пярвічнай арганізацыі БРСМ універсітэта Ірына Шалыгіна адзначае, што студэнты працуюць у атрадах па профілі навучання, а значыць, атрымліваюць непаўторны прафесійны вопыт.

– Нашы студэнты матываваныя і зацікаўленыя працаваць у студатрадах. Асноўны трудавы семестр – гэта летні перыяд, але ў рамках практыкі гэта толькі ў плюс. У мінулым годзе працаўладкавалі 436 чалавек. Спадзяемся, што сёлета ўдасца далучыць да студатрадаўскага руху яшчэ больш моладзі. Ужо ёсць заяўкі ад працадаўцаў на лета. Многія з прадпрыемстваў імкнуцца атрымаць менавіта нашых студэнтаў, супрацоўнічаюць з намі з году ў год. І вельмі прыемна, што моладзь там сустракаюць нашы выпускнікі, некаторыя нават самі прайшлі праз студатрадаўскі рух. У нас пастаянна праводзяцца тэматычныя мерапрыемствы, вытворчыя экскурсіі, але праца ў студатрадзе, калі ты можаш паспрабаваць сябе ў профільнай спецыфіцы, – гэта непаўторны вопыт. Многім гэта дапамагае вызначыцца з будучыняй. Таксама адзначу, што студатрады – важная прыступка ў асобасным росце маладых людзей: многія з нашых студэнтаў кіруюць штабамі рэспубліканскіх праектаў студатрадаўскага руху.

Прафесійныя кадры – свае

«Магілёўтрансмаш» заўсёды рады падтрымаць маладых людзей, якія шчыра хочуць рэалізавацца ў прафесіі. Для выпускнікоў школ прапануюць мэтавыя накіраванні для атрымання адукацыі, а будучым маладым спецыялістам – грунтоўную сістэму бонусаў. Тамара Ратнікава, начальнік аддзела кадраў завода «Магілёўтрансмаш», адзначае, што студэнцкія атрады тут успрымаюць як добры спосаб знайсці для сябе высокаматываваных прафесіяналаў.

– Робім стаўку на моладзь. Каб атрымаць добрага спецыяліста, трэба актыўна ўдзельнічаць у яго навучанні і падрыхтоўцы. Цудоўна разумеем, што камплектацыя кадрамі адбываецца марудна, часам не хапае працоўных рук. Таму для нас работа са студэнцкімі атрадамі – добрая падтрымка і дапамога. А для маладых людзей – магчымасць азнаёміцца з усімі нюансамі прафесіі. Выпусцяцца з універсітэта яны інжынерамі, а, як вядома, добры той кіраўнік, што калісьці быў на месцы сваіх падначаленых.

Да студатрадаўцаў «Магілёўтрансмаш» ставіцца ўважліва і клапатліва. Вопытныя працаўнікі заўсёды гатовыя навучыць, падказаць. Таму супрацоўніцтва атрымліваецца плённым.

– Мы другі год узаемадзейнічаем з БРУ, прымаем на прадпрыемстве ўжо трэцюю змену, – адзначае Тамара Ратнікава. – Ёсць дамоўленасць з універсітэтам і на летні перыяд. Работа аплачваецца, мы за гэтым уважліва сочым. Таксама кожнаму студатрадаўцу на месяц выдаецца 50 рублёў, якія яны могуць выдаткаваць на харчаванне ў сталовай завода. А калі выпускнікі вырашаць звязаць свой працоўны шлях з «Магілёўтрансмашам» – падтрымаем.

Для тых, хто яшчэ не вызначыўся, дзе працаваць пасля ўніверсітэта, падказваем. Кожны месяц маладыя спецыялісты на «Магілёўтрансмашы» атрымліваюць дадаткова да заработнай платы 100 рублёў. Калі ж малады спецыяліст адпрацуе тэрмін і заключыць кантракт яшчэ на тры гады, яму выплацяць 3000 рублёў. Малады чалавек, які вярнуўся на завод пасля службы ў войску, пры заключэнні кантракту на максімальны тэрмін можа разлічваць на грашовую выплату ў памеры 5000 рублёў.

Са студатрадаўцамі мы правялі ўсяго паўтары гадзіны. Аднак за гэты час паспелі натхніцца шчырасцю і энергіяй маладосці. Пацвярджаем: «ГОСТ» працуе адказна і якасна. Калісьці такімі спецыялістамі будуць ганарыцца беларускія прадпрыемствы. А я дадам: дзе мае студэнцкія гады?

Алёна КУХАРАВА, фота аўтара ^[1]